یورپی یونین نے 9 مئی کے واقعات میں ملوث 25 ملزمان کو فوجی عدالت کی طرف سے سنائی گئی سزا پر تشویش کا اظہار کرتے ہوئے کہا ہے کہ یہ فیصلے ان ذمہ داریوں سے مطابقت نہیں رکھتے جو پاکستان نے سول اور سیاسی بین الاقوامی معاہدے کے تحت اٹھائے ہیں۔
یورپین ایکسٹرنل ایکشن سروس کے جاری بیان میں کہا گیا ہے کہ آئی سی سی پی آر کے آرٹیکل 14 کے مطابق، ہر فرد کو ایسی عدالت میں منصفانہ اور عوامی مقدمے کی سماعت کا حق حاصل ہے جو آزاد، غیر جانبدار اور اہل ہو، اور اسے مناسب اور موثر قانونی نمائندگی کا حق حاصل ہو۔
مزید برآں آرٹیکل 14 میں یہ بھی کہا گیا ہے کہ کسی بھی فوجداری مقدمے میں دیا گیا فیصلہ عام کیا جائے گا۔
دوسری جانب، پاکستان تحریک انصاف (پی ٹی آئی) نے ہفتے کے روز 9 مئی کے فسادات میں ملوث ملزمان کو فوجی عدالتوں کی طرف سے سنائی گئی سزا کی مذمت کرتے ہوئے کہا کہ یہ فیصلے غیر قانونی اور غیر آئینی ہیں۔ جبکہ قومی اسمبلی میں اپوزیشن لیڈر عمر ایوب نے کہا کہ وہ فوجی عدالت کے فیصلے کے خلاف عدالت جائیں گے۔