الیکشن کمیشن آف پاکستان (ای سی پی) نے عادل بازئی کی بطور رکن قومی اسمبلی (ایم این اے) رکنیت بحال کرتے ہوئے انہیں آزاد امیدوار نامزد کرنے کا نوٹیفکیشن جاری کردیا۔
ای سی پی نے ایک باضابطہ نوٹیفکیشن کے ذریعے این اے 262 کوئٹہ کیلئے بازئی کی رکنیت بحال کر دی، جس میں واضح کیا گیا کہ وہ پاکستان مسلم لیگ نواز (پی ایم ایل-این) سے وابستہ ہونے کے بجائے آزاد امیدوار تصور کیے جائیں گے۔
اس سے قبل، عادل بازئی کو بجٹ اور 26ویں آئینی ترمیم پر ووٹنگ کے دوران پارٹی پالیسی سے انحراف کے الزامات کا سامنا کرنا پڑا تھا۔
انہیں ای سی پی نے مسلم لیگ ن کے صدر نواز شریف کی جانب سے دائر ریفرنس کی بنیاد پر نااہل قرار دیا تھا۔
تاہم سپریم کورٹ نے ای سی پی کے فیصلے کو کالعدم قرار دیتے ہوئے بازئی کو ان کی این اے 262 کوئٹہ کی نشست پر بحال کر دیا تھا۔
ای سی پی نے یہ بھی اعلان کیا کہ بازئی کو ڈی سیٹ کرنے کا اس کا سابقہ نوٹیفکیشن سپریم کورٹ کے حتمی فیصلے تک معطل رہے گا۔