تیل کی قیمتوں میں بڑی تبدیلی،ڈیزل سستا، عوام کیلئے ریلیف کا اعلان

اسلام آباد(ایگزو نیوز ڈیسک)وزیراعظم شہباز شریف نے عوام کو ریلیف فراہم کرنے کے لیے اہم فیصلہ کرتے ہوئے ڈیزل کی قیمت میں 32 روپے 12 پیسے فی لیٹر کمی کی منظوری دے دی ہے، جس کے بعد نئی قیمت 353 روپے 43 پیسے مقرر کر دی گئی ہے، جبکہ پیٹرول کی قیمت کو موجودہ سطح پر برقرار رکھنے کا فیصلہ کیا گیا ہے۔
وزیراعظم ہاوس سے جاری اعلامیے کے مطابق یہ فیصلہ عوامی مشکلات کو مدنظر رکھتے ہوئے کیا گیا ہے، جس کا مقصد مہنگائی کے بوجھ میں کمی لانا اور ٹرانسپورٹ سمیت مختلف شعبوں پر پڑنے والے اخراجات کو کم کرنا ہے۔ حکومتی فیصلے کے تحت ڈیزل کی قیمت 385 روپے 54 پیسے سے کم ہو کر 353 روپے 43 پیسے ہو گئی ہے، جس سے ملک بھر میں اشیائے ضروریہ کی ترسیل کے اخراجات میں بھی کمی کی توقع ظاہر کی جا رہی ہے۔وزیراعظم شہباز شریف نے اس موقع پر کہا کہ حکومت کی اولین ترجیح عوام کو ریلیف فراہم کرنا ہے اور تیل کی قیمتوں میں کمی کے اثرات کو جلد از جلد عام آدمی تک منتقل کیا جائے گا۔ انہوں نے متعلقہ اداروں کو ہدایت کی کہ قیمتوں میں کمی کا فائدہ براہِ راست عوام تک پہنچانے کیلئے موثر اقدامات کیے جائیں۔دوسری جانب پیٹرولیم ڈویڑن کے ذرائع کے مطابق پیٹرول کی قیمت برقرار رکھنے کا فیصلہ کیا گیا ہے، جس کی بنیادی وجہ عالمی منڈی میں قیمتوں کے اتار چڑھاو اور مالیاتی توازن کو برقرار رکھنا بتایا جا رہا ہے۔واضح رہے کہ حالیہ دنوں میں مشرق وسطیٰ کی کشیدہ صورتحال کے باعث عالمی سطح پر تیل کی قیمتوں میں اضافہ دیکھنے میں آیا تھا، تاہم آبنائے ہرمز کی بحالی کے بعد عالمی منڈی میں تیل کی قیمتوں میں کمی کا رجحان سامنے آیا، جس کے بعد حکومت نے عوام کو ریلیف دینے کا فیصلہ کیا۔ماہرین کے مطابق ڈیزل کی قیمت میں کمی سے ٹرانسپورٹ، زراعت اور صنعتی شعبوں کو براہ راست فائدہ پہنچے گا، جبکہ مجموعی طور پر مہنگائی میں کمی لانے میں بھی مدد مل سکتی ہے، بشرطیکہ اس کے اثرات موثر انداز میں مارکیٹ تک منتقل کیے جائیں۔