پاکستانی اداکار دانش تیمور کو اپنی چار شادیوں سے متعلق بیان پر شدید تنقید کا سامنا کرنا پڑا، جس کے بعد انہیں معافی مانگنا پڑی۔
دانش تیمور ایک نجی ٹی وی چینل کی رمضان ٹرانسمیشن میں مصروف ہیں۔ رواں ہفتے ان کی اہلیہ، اداکارہ عائزہ خان بھی پروگرام میں مہمان کے طور پر شریک ہوئیں، جہاں دانش تیمور نے چار شادیوں سے متعلق ایک بیان دیا۔ انہوں نے کہا کہ "مجھے اللہ کی طرف سے چار شادیوں کی اجازت ہے، مگر میں فی الحال ایسا نہیں کر رہا۔”
اس بیان میں لفظ "فی الحال” اور چار شادیوں کی بات پر سوشل میڈیا پر شدید ردعمل آیا، جس پر دانش تیمور نے معذرت کی۔
اداکار نے اپنے انسٹاگرام پر ویڈیو شیئر کرتے ہوئے کہا، "میں جانتا ہوں کہ آپ مجھ سے ناراض ہیں۔ میرے کچھ پرستار سمجھتے ہیں کہ میں نے عائزہ کی بے عزتی کی، مگر ایسا نہیں ہے۔ میں اپنی بیوی سے بہت محبت کرتا ہوں۔ الفاظ کا انتخاب شاید درست نہیں تھا، میں عموماً ‘فی الحال’ استعمال کرتا ہوں جو موجودہ حالات کی طرف اشارہ کرتا ہے۔”
انہوں نے مزید کہا، "ہم سب کو ایک دن مرنا ہے، الحمدللہ کبھی زندگی میں کوئی تنازعہ نہیں آیا، اس معاملے کو ختم کیا جائے۔ اگر کسی کو میری بات سے تکلیف پہنچی ہو تو میں معافی مانگتا ہوں۔ میں آپ کو پریشان نہیں کرنا چاہتا، میں نے آپ کو انٹرٹین کرنے کیلئے اپنی زندگی وقف کی ہے اور چاہتا ہوں کہ آپ سب خوش رہیں جیسے میں اپنے گھر میں بیوی بچوں کے ساتھ خوش ہوں۔”