وفاقی تحقیقاتی ایجنسی (ایف آئی اے) کے سائبر کرائم ونگ نے وزیر اعلیٰ پنجاب مریم نواز کی سوشل میڈیا پر ایڈٹ شدہ تصاویر کی تحقیقات کا آغاز کر دیا ہے۔
تفصیلات کے مطابق پنجاب حکومت کی درخواست پر ملزمان کے خلاف انکوائری شروع کی گئی۔ ترمیم شدہ تصاویر، جن میں مریم نواز کو متحدہ عرب امارات کے صدر کے ساتھ دکھایا گیا ہے، سوشل میڈیا پلیٹ فارمز پر بڑے پیمانے پر شیئر کی گئیں۔
ایف آئی اے نے کہا کہ ترمیم شدہ مواد کو اپ لوڈ اور شیئر کرنے کے ذمہ داروں کے خلاف کارروائی کی جائے گی۔
تحقیقات کے حصے کے طور پر ایف آئی اے کا سائبر کرائم ونگ لاہور سمیت ملک بھر میں انکوائری کرے گا۔ ایجنسی نے متنبہ کیا ہے کہ غلط معلومات اپ لوڈ کرنے اور شیئر کرنے کے مجرم پائے گئے افراد کو قانونی نتائج کا سامنا کرنا پڑے گا۔
اس سے قبل پنجاب کی وزیر اطلاعات عظمیٰ بخاری نے کہا تھا کہ پاکستان میں خواتین کو بدنام کرنے کے لیے ڈیپ فیک ویڈیوز کا استعمال کیا جا رہا ہے۔