سی ایس ایس 2024 کی 364 اسامیاں جاری،پنجاب کے امیدوار سب سے زیادہ مواقع کے حقدار،خواتین اور اقلیتوں کیلئے خصوصی کوٹہ مقرر

اسلام آباد(ایگزو نیوز ڈیسک) فیڈرل پبلک سروس کمیشن (ایف پی ایس سی) نے سینٹرل سپیریئر سروسز (سی ایس ایس) امتحان 2024 کے تحت مختلف وفاقی محکموں میں مختص اسامیوں کی تفصیلات جاری کر دی ہیں، رواں سال مجموعی طور پر 364 اسامیاں دستیاب ہیں جن میں 247 نئی اور 117 گزشتہ برسوں سے خالی رہ جانے والی آسامیاں شامل ہیں۔
وفاقی دارالحکومت اسلام آباد سے جاری نوٹیفکیشن کے مطابق ان اسامیوں میں اوپن میرٹ کے تحت 214 نشستیں، خواتین کے لیے 32 اور اقلیتوں کے لیے 118 نشستیں مختص کی گئی ہیں، تاکہ وفاقی سطح پر میرٹ اور نمائندگی کے اصولوں کو مزید مضبوط بنایا جا سکے۔صوبائی اور علاقائی بنیادوں پر تقسیم کے مطابق پنجاب کے امیدواروں کے لیے سب سے زیادہ 179 نشستیں رکھی گئی ہیں، جب کہ خیبر پختونخوا کے لیے 48، بلوچستان کے لیے 31، سندھ (دیہی) کے لیے 32 اور سندھ (شہری) کے امیدواروں کے لیے 29 نشستیں مختص کی گئی ہیں۔اسی طرح سابقہ فاٹا کے امیدواروں کے لیے 15، آزاد جموں و کشمیر کے لیے 8 اور گلگت بلتستان کے امیدواروں کے لیے 4 نشستیں مقرر کی گئی ہیں۔ ان اعداد و شمار سے ظاہر ہوتا ہے کہ ایف پی ایس سی نے اس سال بھی صوبوں کے مابین متوازن نمائندگی کو یقینی بنانے کے لیے واضح اور شفاف طریقہ کار اپنایا ہے۔ذرائع کے مطابق سی ایس ایس 2024 کے امتحانی نتائج کے اعلان کے بعد کامیاب امیدواروں کو مختلف گروپس اور سروسز میں میرٹ اور ترجیحی بنیادوں پر الاٹمنٹ دی جائے گی۔ کمیشن کے مطابق اس سال امیدواروں کی بڑی تعداد نے امتحان میں حصہ لیا، جس سے مقابلہ گزشتہ برسوں کے مقابلے میں مزید سخت ہونے کا امکان ہے۔وفاقی پبلک سروس کمیشن نے واضح کیا ہے کہ تمام تقرریاں مکمل شفافیت، میرٹ اور وفاقی پالیسی کے مطابق کی جائیں گی تاکہ بہترین اور اہل امیدواروں کو قومی خدمت کا موقع فراہم کیا جا سکے۔