بھارت کیخلاف فخر زمان کے متنازع آوٹ پر ہنگامہ،پاکستان ٹیم مینجمنٹ کا تھرڈ امپائر کے فیصلے پر شدید احتجاج

دبئی(ایگزو نیوز ڈیسک)ایشیا کپ کے روایتی حریف بھارت کے خلاف میچ میں قومی ٹیم کے بلے باز فخر زمان کے متنازع آوٹ نے نیا تنازعہ کھڑا کر دیا ہے،پاکستانی ٹیم مینجمنٹ نے اس فیصلے پر باضابطہ شکایت درج کراتے ہوئے منیجر امپائرز اور میچ ریفری کو ای میل ارسال کی ہے، جس میں فیصلے کو ناقص اور کھیل کے اصولوں کے خلاف قرار دیا گیا ہے۔
ایگزو نیوز کے مطابق پاکستانی ٹیم مینجمنٹ کا کہنا ہے کہ فخر زمان کو کیچ آوٹ قرار دینا انتہائی متنازع تھا۔ ان کے مطابق ٹی وی امپائر نے شواہد کا بغور جائزہ نہیں لیا اور فیصلہ عجلت میں سنا دیا۔ شکایت میں موقف اختیار کیا گیا ہے کہ تھرڈ امپائر کا فرض تھا کہ وہ تمام اینگلز سے فوٹیج کا معائنہ کرتے اور پھر کوئی فیصلہ سناتے، مگر اس بنیادی تقاضے کو نظر انداز کیا گیا۔ٹیم مینجمنٹ نے مزید کہا کہ جب کیچ کی صورتحال مبہم ہو یا شواہد مکمل طور پر واضح نہ ہوں تو اصولی طور پر بیٹسمین کو “بینفٹ آف ڈاوٹ” دیا جاتا ہے۔ لیکن اس موقع پر امپائر نے اس مسلمہ اصول کو نظر انداز کرتے ہوئے فیصلہ فیلڈنگ سائیڈ کے حق میں دیا، حالانکہ فوٹیج میں کیچ کی قانونی حیثیت پر سوالیہ نشان موجود تھے۔یہ معاملہ صرف ایک کھلاڑی کے آوٹ ہونے تک محدود نہیں رہا بلکہ اب کھیل کے ضابطوں اور امپائرنگ کے معیار پر بھی سنجیدہ سوالات اٹھا رہا ہے۔ پاکستانی شائقین اور کرکٹ مبصرین نے بھی اس فیصلے پر شدید تحفظات کا اظہار کیا ہے اور اسے میچ کے نتائج پر اثرانداز ہونے والا متنازع لمحہ قرار دیا ہے۔پاکستانی ٹیم مینجمنٹ کی شکایت نے ایک نئی بحث کو جنم دیا ہے کہ آیا انٹرنیشنل کرکٹ کونسل (آئی سی سی) کے قوانین کے مطابق ٹی وی امپائرز کے فیصلوں میں مزید شفافیت اور یکسانیت لانے کے لیے اقدامات ناگزیر ہو چکے ہیں یا نہیں۔ خاص طور پر جب بڑے ایونٹس میں ایک فیصلے سے نہ صرف کھلاڑی بلکہ پوری ٹیم کی پوزیشن متاثر ہوتی ہے۔اب نگاہیں اس بات پر مرکوز ہیں کہ امپائرز اور میچ ریفری پاکستان ٹیم مینجمنٹ کی اس شکایت پر کس حد تک غور کرتے ہیں اور آیا مستقبل میں ایسے تنازعات سے بچنے کے لیے کوئی عملی اقدامات کیے جاتے ہیں یا نہیں۔ یہ تنازعہ بلاشبہ کرکٹ کے کھیل میں امپائرنگ کے معیار پر نئے سوالات کھڑا کر گیا ہے۔