چیف آف آرمی اسٹاف جنرل عاصم منیر نے مقبوضہ جموں و کشمیر کے لوگوں کیلئے پاکستان کی مستقل حمایت کا اعادہ کیا ہے۔
آرمی چیف نے ان خیالات کا اظہار اپنے دورہ مظفرآباد کے دوران کشمیر کے سابق فوجیوں سے بات چیت کرتے ہوئے کیا۔ انہوں نے شہداء کی قربانیوں کو خراج عقیدت بھی پیش کیا۔
جموں و کشمیر یادگار پر پہنچنے پر انہوں نے یادگار شہداء پر پھولوں کی چادر چڑھائی اور شہداء کی بے مثال قربانیوں کو شاندار خراج عقیدت پیش کیا۔
آرمی چیف نے کہا کہ بھارتی مظالم اور بڑھتی ہوئی ہندوتوا انتہا پسندی کشمیریوں کے حق خود ارادیت کی جدوجہد کے عزم کو مضبوط کرتی ہے۔ انہوں نے اس بات کا اعادہ کیا کہ پاکستان ریاستی سرپرستی میں ہونے والے جبر کے خلاف ان کے منصفانہ اور جائز مقصد میں ہمیشہ ان کے ساتھ کھڑا رہے گا۔
انہوں نے کہا کہ ’’بلا شبہ کشمیر ایک دن آزاد ہوگا اور پاکستان کا حصہ بنے گا‘‘۔
جنرل عاصم منیر نے کشمیر میں تعینات افسران اور سپاہیوں کی غیر متزلزل لگن، پیشہ ورانہ مہارت اور جنگی تیاری کی بھی تعریف کی۔ انہوں نے مسلح افواج کی جنگی تیاریوں پر مکمل اعتماد کا اظہار کیا اور اس بات کا اعادہ کیا کہ کسی بھی جارحیت کا جواب دیا جائے گا۔
قبل ازیں آرمی چیف کی آمد پر کور کمانڈر راولپنڈی نے استقبال کیا۔