چینی کمپنی چینگڈو نے پنجاب میں انفارمیشن اینڈ ٹیکنالوجی اور سمارٹ سٹی منصوبوں میں 700 ملین امریکی ڈالر کی سرمایہ کاری کرنے کا اعلان کیا۔
یہ اعلان اسلام آباد میں وزیر اعلیٰ پنجاب مریم نواز شریف سے چین کے اعلیٰ سطحی وفد کی ملاقات کے دوران کیا گیا۔ وفد میں چینگڈو جنرل کوآرڈینیٹر برائے آئی سی ٹی ہب مس اسکارلیٹ اور ہواوے کے ڈپٹی سی ای او مسٹر یو رے شامل تھے۔
وزیراعلیٰ نے سرمایہ کاری کیلئے رضامندی ظاہر کرتے ہوئے صوبے میں متعدد اقدامات کی راہ ہموار کی۔ ای ٹیکسی سروس متعارف کرائی جائے گی جبکہ لاہور میں نواز شریف آئی ٹی سٹی میں کلاؤڈ اور ڈیٹا سینٹرز بھی قائم کیے جائیں گے۔ پنجاب حکومت منصوبے کیلئے زمین اور عمارتیں فراہم کرے گی۔
پاکستان میں پہلا ای کامرس پلیٹ فارم قائم کیا جائے گا جو پاکستانی نوجوانوں کو دنیا بھر میں آن لائن ٹریڈنگ کی تربیت فراہم کرے گا۔
مزید برآں، لاہور میں سمارٹ سٹی کے اقدامات میں ایک سمارٹ کنٹرول روم، سمارٹ ٹریفک مینجمنٹ، سمارٹ ٹرانسپورٹ اور ایک سمارٹ سینی ٹیشن سینٹر شامل ہوں گے۔
اجلاس میں نوجوانوں کو مصنوعی ذہانت کی ٹیکنالوجی میں تربیت دینے کے لیے پروجیکٹ کے فیز ٹو میں ایک اے آئی انڈسٹری سینٹر کے قیام پر بھی تبادلہ خیال کیا گیا۔ چینی حکومت پنجاب میں پلیٹ فارم سروسز کے لیے استعداد کار بڑھانے کے لیے پرعزم ہے۔ اس موقع پر گفتگو کرتے ہوئے مریم نواز شریف نے پنجاب کو خطے کا آئی ٹی ہب بنانے کے عزم کا اظہار کیا۔