چینی سائنسدانوں نے ایسا انتہائی چھوٹا ڈرون تیار کر لیا ہے جو سائز میں مچھر جتنا ہے اور اسے فوجی آپریشنز سمیت دیگر اہم مشنز میں استعمال کیا جا سکتا ہے۔
یہ جدید ڈرون چین کی نیشنل یونیورسٹی آف ڈیفنس ٹیکنالوجی کی روبوٹکس لیبارٹری میں تیار کیا گیا۔ سی سی ٹی وی پر نشر رپورٹ کے مطابق، محقق لیانگ ہیکسیانگ نے اسے پیش کرتے ہوئے بتایا کہ یہ ڈرون معلومات اکٹھا کرنے اور جنگی میدان میں مخصوص کارروائیوں کے لیے مفید ہو سکتا ہے۔
ڈرون کے دو ننھے پروں اور باریک ٹانگوں کا ڈیزائن مچھر جیسا ہے اور یہ اسمارٹ فون سے کنٹرول کیا جا سکتا ہے۔
ماہرین کے مطابق اتنے چھوٹے ڈرون میں سینسرز، پاور یونٹس اور کنٹرول سرکٹس فٹ کرنا ایک بڑا تکنیکی چیلنج ہے، تاہم اس کی کامیاب تیاری اہم پیش رفت ہے۔
یہ ڈرون فوجی استعمال کے ساتھ ساتھ طبی مقاصد، جیسے جسم کے اندر معلومات لینے یا نازک سرجری میں مدد دینے کے لیے بھی کارآمد ثابت ہو سکتا ہے۔