نئے اسلامی سال کے آغاز کے ساتھ ہی غلاف کعبہ کو تبدیل کر دیا گیا، جس کے موقع پر حرم شریف میں رقت آمیز مناظر اور دعاؤں کی گونج سنائی دی۔
تفصیلات کے مطابق، مکہ مکرمہ میں غلاف کعبہ کی تبدیلی کا عمل مکمل ہوا، جس میں سیکڑوں کارکنان نے کئی گھنٹے مسلسل محنت کی۔ یہ عمل نماز عشاء کے بعد شروع ہوا اور نماز فجر تک جاری رہا۔
اس دوران، مسجد الحرام کے صحن میں ہزاروں زائرین طواف میں مصروف رہے، جبکہ حرم شریف کی فضائیں دعاؤں سے گونج اٹھیں۔
غلاف کعبہ کی منتقلی کے لیے خصوصی ٹریلر اور سیکیورٹی کے انتظامات کیے گئے۔ کسوہ کی تیاری میں مخصوص پانی اور اعلیٰ معیار کا خام ریشم استعمال کیا گیا ہے۔
کسوہ کی تیاری میں 24 قیراط سونے اور چاندی کے دھاگے سے کشیدہ کاری کی جاتی ہے، اور قرآنی آیات کو انتہائی نفاست کے ساتھ کپڑے پر چھاپا جاتا ہے۔
اتارے گئے غلاف کعبہ سے سونے کے حصے الگ کر کے محفوظ کیے جاتے ہیں۔ ہر آیت کی کشیدہ کاری انتہائی باریکی سے کی جاتی ہے، اور تیاری میں سادہ اور نقش دار دونوں اقسام کی بُنائی شامل ہوتی ہے۔ یہ غلاف سال بھر کی محنت کا نتیجہ ہوتا ہے۔