پاکستان کے سپر اسٹار اداکار عدنان صدیقی کی بکنگھم پیلس میں کنگ چارلس سے ملاقات کے بعد زارا نور عباس اور احمد علی بٹ سمیت مشہور شخصیات نے اپنے ردعمل میں خوشی اور فخر کا اظہار کیا ہے۔
عدنان صدیقی بادشاہ چارلس اور ملکہ کمیلا کی طرف سے ٹی وی اور فلم انڈسٹری کے افراد کیلئے منعقد کی جانے والی ایک تقریب میں شریک ہوئے تھے، جہاں دنیا بھر سے اداکاروں، ڈائریکٹرز، ٹی وی پریزینٹرز، اسٹنٹ پرفارمرز اور کاسٹم ڈیزائنرز کو پیلس میں مدعو کیا گیا تھا۔
عدنان صدیقی نے اس ملاقات کی جھلکیاں اپنے انسٹاگرام پر شیئر کرتے ہوئے لکھا، "ہماری بات چیت مختصر مگر پرجوش تھی- پلک جھپکتے ہی مختلف دنیاؤں کی ملاقات۔ انہوں نے مزید کہا کہ بادشاہ چارلس میں لوگوں کو سکون دینے کی ایک منفرد صلاحیت تھی، جس نے ایک طویل اثر چھوڑا۔ یہ ہر دن کی بات نہیں کہ آپ کسی ایسے شخص سے ملیں، جس کی موجودگی آپ کے ذہن میں لمبے عرصے تک باقی رہ جائے۔
عدنان صدیقی کی اس ملاقات کی خبر سامنے آنے کے بعد پاکستانی مشہور شخصیات نے ان کے انسٹاگرام پوسٹ پر جوش بھرے کمنٹس کی بھرمار کر دی۔ اداکارہ زارا نور عباس نے اپنے انسٹاگرام اسٹوریز پر عدنان صدیقی کا پوسٹ دوبارہ شیئر کرتے ہوئے لکھا، ہینڈسمز کا بادشاہ، بادشاہ چارلس سے ملا۔ عدنان صدیقی پر مجھے بہت فخر ہے۔
احمد علی بٹ نے بھی عدنان صدیقی کی اس کامیابی پر محبت بھرا پیغام دیا اور چارلس کے ساتھ ان کی ایک تصویر کو میم کی شکل میں شیئر کرتے ہوئے "پروڈ آف یو” کا اسٹیکر لگایا۔
پاکستانی ستاروں کی جانب سے اپنے اداکار ساتھی کیلئے اس محبت اور فخر کا اظہار، عدنان صدیقی کی اس ملاقات کو ایک تاریخی لمحہ بنا رہا ہے۔