پاکستان تحریک انصاف (پی ٹی آئی) کے بانی عمران خان کی اہلیہ بشریٰ بی بی کے ویڈیو بیان پر خیبر پختونخوا کے مشیر اطلاعات بیرسٹر سیف کی وضاحت آگئی، کہا سابق خاتون اول کا بیان پارٹی کی پالیسی نہیں، ذاتی بیان ہے۔
بیرسٹر سیف نے واضح کیا ہے کہ پارٹی کی پالیسی صرف پارٹی کے چیئرمین، سیکرٹری جنرل یا ترجمان کی جانب سے دی جا سکتی ہے۔
واضح رہے کہ بانی پی ٹی آئی کی اہلیہ نے ایک ویڈیو پیغام میں الزام لگایا کہ سعودی عرب میں ان کے مدینہ منورہ کے دورے کے بعد سابق آرمی چیف کو کالز موصول ہوئیں جہاں انہیں بتایا گیا کہ عمران خان انہیں قابل قبول نہیں ہیں۔ بشریٰ بی بی نے دعویٰ کیا کہ ان کالز کے بعد ان کی کردار کشی کی گئی اور خان کو ’یہودی ایجنٹ‘ کہا گیا۔
دوسری جانب، جنرل (ر) قمر جاوید باجوہ نے سابق خاتون اول کی جانب سے عمران خان کے دورہ سعودی عرب کے بعد فون آنے کے الزامات کو مسترد کرتے ہوئے کہا، بشریٰ بی بی جھوٹ بول رہیں ہیں۔ مجھے ایسی کوئی کال موصول نہیں کی۔