میلبورن کرکٹ گراؤنڈ میں باکسنگ ڈے ٹیسٹ کے دوسرے دن بھارت نے آسٹریلیا کے 474 رنز کے جواب میں اپنی پہلی اننگز میں 5 وکٹوں کے نقصان پر 164 رنز بنا لیے ہیں۔
بھارت کو میزبان ٹیم کی برتری ختم کرنے کیلئے مزید 310 رنز بنانے ہیں جبکہ اُس کی 5 وکٹیں باقی ہے۔ بھارت کی جانب سے یشاسوی جیسوال 82 رنز بنا کر نمایاں رہے کھلاڑی رہے۔ جبکہ ویرات کوہلی نے 36 رنز سکور کیے۔
اس سے قبل آسٹریلیا نے ٹاس جیتنے کے بعد اچھی شروعات کی اور کونسٹاس، جنہوں نے بھارت کے خلاف ٹیسٹ ڈیبیو کیا تھا نے 65 گیندوں پر 60 رنز بنائے، اُن کی شاندار اننگز میں چھ چوکے اور دو چھکے شامل ہیں۔ اپنی اننگز میں کونسٹاس نے اپنے غیر روایتی اسٹروک پلے سے تماشائیوں کو متاثر کیا، انہوں نے جسپریت بمراہ کا مقابلہ بے دریغ کیا، جو اب تک سیریز کے بہترین باؤلر اور سب سے زیادہ وکٹیں لینے والے بولر ہیں۔ اس کے علاوہ عثمان خواجہ اور مارنس لیبوشگن نے بھی نصف سنچریز بنائی۔
بعد ازاں اسٹیو اسمتھ کے شاندار 140 رنز کی بدولت ٹیم کو سکور 474 رنز تک پہنچا۔ آسٹریلوی بلے باز کی اس سیریز میں دوسری، مجموعی طور پر 34 ویں جبکہ بھارت کے خلاف 11 ویں سنچری ہے۔
بھارت کی جانب سے جسپریت بمراہ نے 28.4 اوورز میں 99 رنز دے کر چار وکٹیں حاصل کیں جبکہ رویندر جڈیجا نے تین کھلاڑیوں کو پویلین کی راہ دکھائی۔