امریکی صدر ڈونلڈ ٹرمپ کے تجارتی ٹیرف کے فیصلے کے بعد عالمی اسٹاک مارکیٹس میں بھونچال آ گیا ہے اور ڈیجیٹل کرنسی بٹ کوائن بھی اس سے متاثر ہوئی ہے۔
امریکی میڈیا کے مطابق ٹرمپ کے ٹیرف کے اعلان کے بعد بٹ کوائن کی قیمت میں 10 فیصد کمی آئی ہے اور یہ 78 ہزار امریکی ڈالر سے نیچے آ گئی ہے۔ پاکستانی روپے میں اس کی قیمت 2 کروڑ 16 لاکھ 94 ہزار 882 روپے رہی۔
اس فیصلے کے بعد عالمی اسٹاک ایکسچینجز میں شدید اتار چڑھاؤ آیا ہے، جس سے سرمایہ کاروں کو اربوں ڈالر کا نقصان ہوا ہے۔ تاہم، ٹرمپ اپنے فیصلے پر ثابت قدم ہیں اور انہوں نے کہا ہے کہ وہ اس وقت تک ٹیرف سے پیچھے نہیں ہٹیں گے جب تک دوسرے ممالک اپنے تجارتی حجم کو امریکا کے برابر نہیں کر دیتے۔
ٹرمپ نے عالمی اسٹاک مارکیٹس کی صورتحال پر کہا کہ انہوں نے جان بوجھ کر اتار چڑھاؤ پیدا نہیں کیا، اور یہ کہ امریکا کی سابقہ قیادت کو دنیا نے بری طرح استعمال کیا۔ ان کا مزید کہنا تھا کہ ٹیرف سے امریکا کو اربوں ڈالر مل رہے ہیں۔