بچے کی سالگرہ ہولناک سانحے میں بدل گئی،کیلی فورنیا فائرنگ میں 4 ہلاک، 14 زخمی، پولیس تحقیقات میں مصروف

اسٹاکن(ایگزو نیوز ڈیسک)امریکی ریاست کیلیفورنیا کے شہر اسٹاکٹن میں ہفتے کی رات ایک خاندانی تقریب خوفناک سانحے میں بدل گئی جب بچے کی سالگرہ کے دوران فائرنگ کے نتیجے میں 4 افراد ہلاک اور 14 زخمی ہوگئے۔پولیس کے مطابق واقعہ ممکنہ طور پر ٹارگٹڈ لگتا ہے اور تحقیقات جاری ہیں،جائے وقوعہ کو سیل کر کے شواہد اکٹھے کیے جا رہے ہیں جبکہ حکام  نے حملہ آور کی شناخت یا اس کے محرکات کے بارے میں ابھی تک کوئی تفصیل فراہم نہیں کی،یہ واقعہ مقامی کمیونٹی کے لیے صدمے اور خوف کی لہر کا باعث بن گیا ہے۔
ایگزو نیوز کے مطابق امریکی ریاست کیلیفورنیا کے شہر اسٹاکٹن میں ہفتے کی رات ایک خاندانی تقریب کے دوران فائرنگ کا خوفناک واقعہ پیش آیا جس میں کم از کم 4 افراد ہلاک اور 14 شدید زخمی ہوگئے،پولیس اور مقامی حکام کے مطابق یہ واقعہ بچے کی سالگرہ کی تقریب کے دوران ہوا۔خبر رساں ادارے رائٹرز کے مطابق واقعہ اسٹاکٹن کے شمالی علاقے میں پیش آیا، جہاں فائرنگ کی اطلاع مقامی وقت کے مطابق شام چھ  بجے کے قریب موصول ہوئی۔سان جواکین کاونٹی شیرف آفس نے بتایا کہ فوری طور پر موقع پر پہنچ کر زخمیوں کو ہسپتال منتقل کیا گیا جبکہ ہلاک شدگان کی شناخت کی جارہی ہے۔اسٹاکٹن کے نائب میئر جیسن لی نے سوشل میڈیا پر اپنے پیغام میں کہا کہ وہ واقعے کی تفصیلات جاننے کے لیے حکام سے رابطے میں ہیں اور جلد ہی حقیقت سامنے لائی جائے گی۔ان کا کہنا تھا کہ ایسے واقعات مقامی کمیونٹی کے لیے نہایت تشویش ناک ہیں اور سبھی متاثرہ خاندانوں کے ساتھ مکمل تعاون کیا جائے گا۔پولیس نے ابتدائی بیان میں کہا کہ واقعہ ممکنہ طور پر ٹارگٹڈ لگتا ہے تا ہم تفتیش ابھی جاری ہے،جائے وقوعہ کو سیل کر دیا گیا ہے اور شواہد جمع کرنے کے لیے تفتیشی ٹیمیں کام کر رہی ہیں۔ حکام نے واضح کیا کہ حملہ آور کے بارے میں ابھی تک کوئی تفصیل سامنے نہیں آئی اور تمام پہلووں کا جائزہ لیا جا رہا ہے۔واقعے نے اسٹاکٹن کی کمیونٹی میں خوف اور صدمے کی لہر دوڑا دی ہے کیونکہ یہ ایک خاندانی تقریب کے دوران پیش آیا،جس میں بچے اور اہل خانہ موجود تھے۔مقامی سیکیورٹی اہلکار اور پولیس کے حکام اس بات کو یقینی بنانے کے لیے کام کر رہے ہیں کہ مزید خطرے سے بچا جا سکے اور واقعے کی مکمل تحقیقات کی جائیں۔یہ واقعہ امریکہ میں بڑھتی ہوئی عوامی جگہوں پر تشدد اور ہتھیاروں کے استعمال کے مسائل پر بھی ایک بار پھر سوالات اٹھا رہا ہے اور مقامی اور وفاقی حکام کی توجہ کو اس جانب مرکوز کر دیا ہے کہ ایسے خطرناک واقعات کی روک تھام کے لیے فوری اور موثر اقدامات کیے جائیں۔