امریکی صدر جو بائیڈن نے دنیا کے غریب ترین ممالک کیلئے عالمی بینک کے انٹرنیشنل ڈیولپمنٹ ایسوسی ایشن (آئی ڈی اے) فنڈ میں 4 ارب ڈالر کی امریکی معاونت کا عہد کیا ہے
عالمی میڈیا کے مطابق یہ اعلان امریکی صدر نے جی 20 کے سربراہی اجلاس کے ایک سیشن میں کیا۔ امریکہ کی جانب سے یہ نیا عہد دسمبر 2021 میں کیے گئے 3.5 ارب ڈالر کے وعدے سے نمایاں طور پر زیادہ ہے۔
یہ واضح نہیں ہے کہ آیا نومنتخب امریکی صدر ٹرمپ، جنہوں نے ماضی میں غیر ملکی امداد میں کمی کرنے کی تجویز دی تھی، بائیڈن کے اس عہد کو پورا کریں گے یا نہیں، کیونکہ ٹرمپ اور ٹیسلا و اسپیس ایکس کے سی ای او ایلون مسک نے امریکی اخراجات میں کمی کرنے کیلئے ایک نیا حکومتی کارکردگی پینل تشکیل دینے کا منصوبہ بنایا ہے۔
امریکی کانگریس کی طرف سے اس فنڈز کی منظوری شاید جنوری میں ٹرمپ کے عہدہ سنبھالنے کے بعد ہی ممکن ہو سکے گی۔ ٹرمپ کے ٹرانزیشن ٹیم کے ترجمان نے اس معاملے پر تبصرہ کرنے کی درخواست کا جواب نہیں دیا۔