نیویارک(ایگزو نیوز ڈیسک)بنگلہ دیش نے عالمی سفارتی محاذ پر ایک بڑی کامیابی حاصل کرتے ہوئے اپنے وزیر خارجہ ڈاکٹر خلیل الرحمان کو اقوام متحدہ کی جنرل اسمبلی کے 81ویں اجلاس کا صدر منتخب کروا لیا ہے، جسے ڈھاکہ کے لیے ایک اہم اور باوقار سفارتی سنگِ میل قرار دیا جا رہا ہے۔
ایگزو نیوز کے مطابق بنگلہ دیش کے وزیر خارجہ ڈاکٹر خلیل الرحمان اقوام متحدہ کی جنرل اسمبلی کے 81ویں اجلاس کے صدر منتخب ہو گئے ہیں،جسے عالمی سفارت کاری میں ڈھاکہ کے لیے ایک اہم اور تاریخی کامیابی قرار دیا جا رہا ہے۔یہ انتخاب منگل کے روز نیویارک میں واقع اقوام متحدہ کے ہیڈکوارٹرز میں منعقدہ اجلاس کے دوران ہوا،جہاں ڈاکٹر خلیل الرحمان نے قبرص کے امیدوار کو شکست دے کر یہ اہم اور باوقار منصب حاصل کیا۔انتخابی عمل کو شفاف اور بین الاقوامی سفارتی روایات کے مطابق قرار دیا جا رہا ہے۔سفارتی مبصرین کے مطابق یہ کامیابی عالمی سطح پر بنگلہ دیش کے بڑھتے ہوئے کردار،کثیرالجہتی سفارت کاری میں اس کی فعال شمولیت اور بین الاقوامی اداروں میں مضبوط ہوتی ہوئی ساکھ کا واضح ثبوت ہے۔
اس موقع پر بنگلہ دیش کے وزیراعظم طارق رحمان نے ڈاکٹر خلیل الرحمان کو مبارکباد پیش کرتے ہوئے کہا کہ ان کا انتخاب عالمی برادری کی جانب سے بنگلہ دیش کی سفارتی خدمات اور مثبت کردار کا اعتراف ہے۔اپنے خصوصی پیغام میں وزیراعظم نے کہا کہ وہ ڈاکٹر خلیل الرحمان کو اس اہم ذمہ داری سنبھالنے پر دل کی گہرائیوں سے مبارکباد پیش کرتے ہیں اور امید ظاہر کرتے ہیں کہ وہ اپنے نئے منصب پر بنگلہ دیش کی موثر نمائندگی کریں گے۔انہوں نے مزید کہا کہ ڈاکٹر خلیل الرحمان عالمی سطح پر مکالمے،تعاون اور مشترکہ چیلنجز سے نمٹنے کے لیے بین الاقوامی رابطوں کے فروغ میں کلیدی کردار ادا کریں گے،جس سے اقوام متحدہ کی جنرل اسمبلی کی کارکردگی مزید موثر ہونے کی توقع ہے۔