چیف آف آرمی سٹاف جنرل سید عاصم منیر سے بنگلا دیشی مسلح افواج کے پرنسپل سٹاف آفیسر لیفٹیننٹ جنرل ایس ایم قمر الحسن کی ملاقات، دونوں ممالک کے درمیان مضبوط دفاعی تعلقات کی اہمیت پر اتفاق کیا۔
آئی ایس پی آر کے مطابق آرمی چیف اور بنگلا دیشی فوج کے پرنسپل سٹاف آفیسر کی ملاقات جنرل ہیڈ کوارٹرز راولپنڈی میں ہوئی۔ ملاقات میں دونوں جانب سے خطے کی بدلتی ہوئی سکیورٹی صورتحال پر تبادلہ خیال کیا گیا۔ پاک بنگلا دیشی عسکری قیادت نے دو طرفہ دفاعی تعاون کو مزید فروغ دینے کے حوالے سے بھی تبادلہ خیال کیا۔
آئی ایس پی آر کے مطابق پاک بنگلہ دیش عسکری قیادت نے دونوں برادر ممالک کے درمیان بیرونی اثر سے پاک پائیدار شراکت داری کی ضرورت پر زور دیا۔ آرمی چیف نے جنوبی ایشیا میں امن اور استحکام کیلئے مشترکہ کاوشوں کی اہمیت کو اجاگر کیا۔ جنرل عاصم منیر نے کہا کہ دونوں ممالک کو مشترکہ دفاعی اقدامات کے ذریعے علاقائی سلامتی میں کردار ادا کرنا چاہیے۔
لیفٹیننٹ جنرل قمرالحسن نے پاک فوج کی غیر معمولی پیشہ ورانہ صلاحیتوں کی تعریف کی۔ بنگلہ دیشی پرنسپل سٹاف آفیسر نے دہشت گردی کے خلاف پاک فوج کی انتھک جدوجہد اور بے پناہ قربانیوں کو بھی سراہا۔
واضح رہے کہ بنگلا دیشی مسلح افواج کے آرمڈ فورسز ڈویژن کے وفد نے لیفٹیننٹ جنرل ایس ایم قمر الحسن کی قیادت میں پاکستان کا دورہ کیا ہے۔