بنگلا دیش کی عبوری حکومت نے پاکستانی شہریوں کیلئے ویزا پالیسی کی پابندیوں میں نرمی کی ہے، جو دونوں ممالک کے درمیان بہتر ہوتے ہوئے باہمی تعلقات کی عکاسی کرتی ہے۔
بھارت نواز بنگلا دیش کی وزیر اعظم حسینہ واجد کی برطرفی کے بعد سے نوبل انعام یافتہ محمد یونس کی قیادت میں بنگلا دیش کی عبوری حکومت پاکستان کے ساتھ تعلقات کو مضبوط بنانے کیلئے سرگرم عمل ہے۔
بنگلا دیش کی حکومت نے پاکستانی شہریوں کیلئے سکیورٹی کلیئرنس حاصل کرنے کی شرط کو ختم کر دیا ہے، جس سے دونوں ممالک کے درمیان آسان سفر کی راہ ہموار ہو گئی ہے۔
بنگلا دیش کی وزارت خارجہ کے سکیورٹی سروسز ڈویژن نے پاکستانی شہریوں کیلئے ویزا کے عمل کو آسان بنانے کے احکامات جاری کیے ہیں۔
وزارت خارجہ نے بیرون ملک تمام مشنز کو پاکستانی شہریوں کیلئے ویزا درخواست کے عمل کو آسان بنانے کی بھی ہدایت کی۔
بنگلا دیش میں پاکستان کے ہائی کمشنر سید احمد معروف کی سابق وزیر اعظم بیگم خالدہ ضیا سے ملاقات کے بعد دونوں ممالک کے دو طرفہ تعلقات میں اہم پیش رفت دیکھی گئی ہے۔ اس ملاقات میں پاکستانی سفیر نے صدر آصف زرداری اور وزیر اعظم شہباز شریف کی جانب سے انہیں رہائی پر مبارکباد پیش کی گئی تھی۔