آئی سی سی کی تازہ ترین ٹیسٹ رینکنگ میں پاکستانی کھلاڑیوں کی پوزیشن میں بہتری آئی ہے۔ ان کھلاڑیوں میں بابر اعظم ، محمد رضوان اور شاہین آفریدی شامل ہیں۔
سری لنکا نے اس ہفتے کے شروع میں اوول میں انگلینڈ کو شکست دے کر انگلش ٹیم کے خلاف تیسرے ٹیسٹ میچ میں فتح حاصل کی۔ اس کے نتیجے میں سری لنکا اور انگلینڈ کے کھلاڑیوں کیلئے آئی سی سی کی ٹیسٹ رینکنگ میں نمایاں تبدیلی آئی ہے۔ ان تبدیلیوں نے دیگر کھلاڑیوں کی رینکنگ کو بھی متاثر کیا ہے۔
سری لنکا کے خلاف تیسرے ٹیسٹ میں 19 اور تین رنز بنانے والے انگلینڈ کے بلے باز ہیری بروک آئی سی سی ٹیسٹ بیٹنگ رینکنگ میں سات درجے گر کر 12 ویں نمبر پر آگئے۔ بروک کی تنزلی کے باعث سات کھلاڑی ایک مقام اوپر چلے گئے، جن میں محمد رضوان اور بابر اعظم بھی شامل ہیں، جو اب بالترتیب نویں اور گیارہویں نمبر پر ہیں۔
قابل ذکر بات یہ ہے کہ بنگلادیش کے خلاف دو ٹیسٹ میچز میں بابر اعظم نے چار اننگز میں صرف 64 رنز بنائے جس کے بعد گزشتہ ہفتے کی آئی سی سی ٹیسٹ رینکنگ میں وہ ٹاپ ٹین بلے بازوں کی فہرست سے باہر ہوگئے تھے۔