پی ایس ایل میں بابر اعظم کا راج برقرار،ایک اور تاریخی کارنامہ انجام دے دیا

کراچی(ایگزو نیوز ڈیسک)بابر اعظم نے پاکستان سپر لیگ(پی ایس ایل)سیزن الیون میں اپنی شاندار فارم کو برقرار رکھتے ہوئے ایک اور تاریخی کارنامہ انجام دے دیا ہے، جس نے ایک بار پھر انہیں ایونٹ کے نمایاں ترین کھلاڑیوں کی صف میں لا کھڑا کیا ہے۔موجودہ سیزن میں ان کی مسلسل کارکردگی اور اہم مواقع پر رنز بنانے کی صلاحیت نے نہ صرف ان کی ٹیم پشاور زلمی کو مضبوط کیا ہے بلکہ لیگ میں ان کے ”راج“ کو مزید مستحکم کر دیا ہے۔
ایگزو نیوز کے مطابق پشاور زلمی کے کپتان بابر اعظم نے پاکستان سپر لیگ کے 2026 سیزن میں ایک اور شاندار کارنامہ انجام دیتے ہوئے 500 رنز کا سنگ میل عبور کر لیا ہے،جس کے بعد وہ لیگ کی تاریخ میں ایک منفرد اعزاز کے حامل کھلاڑی بن گئے ہیں۔بابر اعظم نے یہ سنگ میل اسلام آباد یونائیٹڈ کے خلاف کوالیفائر میچ میں حاصل کیا،جہاں انہوں نے 59 گیندوں پر 103 رنز کی دلکش اننگز کھیلی۔اس کارکردگی کے ساتھ وہ پی ایس ایل کے ایک ہی سیزن میں چوتھی مرتبہ 500 رنز مکمل کرنے والے پہلے کھلاڑی بن گئے ہیں،جو ان کی مستقل مزاجی اور شاندار بیٹنگ فارم کو ظاہر کرتا ہے۔

اعداد و شمار کے مطابق بابر اعظم نے اس سے قبل 2024، 2023 اور 2021 کے سیزنز میں بھی 500 رنز کا ہندسہ عبور کیا تھا۔ان کے علاوہ صرف چند کھلاڑی ہی یہ کارنامہ انجام دے سکے ہیں،جن میں محمد رضوان تین مرتبہ جبکہ فخر زمان اور کوشال مینڈس ایک ایک بار یہ سنگ میل حاصل کر چکے ہیں۔موجودہ سیزن میں بابر اعظم اب تک 10 اننگز میں 588 رنز بنا چکے ہیں،جس کے ساتھ انہوں نے فخر زمان کا ایک سیزن میں سب سے زیادہ 588 رنز کا ریکارڈ بھی برابر کر دیا ہے۔فخر زمان نے یہ ریکارڈ 2022 میں 13 اننگز میں قائم کیا تھا۔بابر اعظم کے پاس ابھی کم از کم ایک اور ممکنہ دو میچز باقی ہیں،جس کے باعث ان کے پاس یہ ریکارڈ اکیلے اپنے نام کرنے کا سنہری موقع موجود ہے اور کرکٹ حلقوں میں اس امکان پر گہری نظر رکھی جا رہی ہے۔