آسٹریلیا نے ویسٹ انڈیز کو پہلے ٹیسٹ میں 159 رنز سے شکست دے کر سیریز میں برتری حاصل کر لی۔
میچ کے تیسرے روز، 301 رنز کے تعاقب میں ویسٹ انڈیز کی ٹیم دوسری اننگز میں صرف 141 رنز پر ہی ڈھیر ہو گئی۔ فاسٹ بولر جوش ہیزل وُڈ نے شاندار بولنگ کا مظاہرہ کرتے ہوئے 43 رنز کے عوض 5 وکٹیں حاصل کیں۔
آسٹریلیا نے دوسری اننگز میں 310 رنز بنائے، جس میں ٹریوس ہیڈ (61)، بیو ویب اسٹر (63) اور ایلکس کیری (65) کی نمایاں بیٹنگ شامل تھی۔
ویسٹ انڈیز کی جانب سے شمر جوزف نے 5 وکٹیں لیں اور میچ میں مجموعی طور پر 9 شکار کیے، مگر ناقص فیلڈنگ نے ٹیم کی محنت کو ضائع کر دیا۔ شائی ہوپ (30)، جسٹن گریوز (38*) اور شمر جوزف (44) نے کچھ مزاحمت کی، لیکن ٹیم ہدف کے قریب نہ پہنچ سکی۔ اسپنر نیتھن لیون نے آخری دو وکٹیں حاصل کیں۔
آسٹریلیا کی ٹیم پہلی اننگز میں 180 رنز پر آؤٹ ہوئی تھی جبکہ ویسٹ انڈیز نے اپنی پہلی اننگز میں 190 رنز بنائے تھے۔
دونوں ٹیموں کے درمیان تین میچوں پر مشتمل سیریز کا دوسرا ٹیسٹ 3 جولائی سے سینٹ جارج میں کھیلا جائے گا، جبکہ تیسرا ٹیسٹ 12 جولائی کو شیڈول ہے۔