راولپنڈی(ایگزو نیوز ڈیسک)پاکستان کے 79ویں یومِ آزادی کے موقع پر مسلح افواج نے قوم کو مبارکباد دیتے ہوئے مادرِ وطن کے دفاع، قومی خودمختاری اور علاقائی سالمیت کے تحفظ کے لیے غیرمتزلزل عزم کا اعادہ کیا ہے۔
پاک فوج کے شعبہ تعلقات عامہ(آئی ایس پی آر)کے مطابق چیف آف آرمی سٹاف و چیف آف ڈیفنس فورسز فیلڈ مارشل،چیف آف دی نیول سٹاف اور چیف آف دی ایئر سٹاف نے قوم کو جشنِ آزادی کی مبارکباد پیش کی۔آئی ایس پی آر کے مطابق مسلح افواج نے بانیانِ پاکستان اور تحریکِ آزادی کے رہنماوں کو خراجِ عقیدت پیش کرتے ہوئے کہا کہ ان کی قربانیوں،وژن،حوصلے اور عزم نے ایک آزاد اور خودمختار پاکستان کے خواب کو حقیقت میں تبدیل کیا۔ان کے اصول اور نظریات آج بھی قوم اور اداروں کے لیے رہنمائی کا ذریعہ ہیں۔مسلح افواج نے اپنے پیغام میں کہا کہ پاکستان کی خودمختاری اور علاقائی سالمیت کے محافظ کی حیثیت سے دفاعِ وطن کا عزم ہر خطرے کے مقابلے میں برقرار رکھا جائے گا۔افواج نے واضح کیا کہ عوام کی جانب سے سونپی گئی مقدس ذمہ داری کو پوری دیانت، پیشہ ورانہ صلاحیت اور عزم کے ساتھ ادا کیا جائے گا۔
آئی ایس پی آر کے مطابق مسلح افواج نے اس بات کا بھی اعادہ کیا کہ وہ آئین کی پاسداری کرتے ہوئے ملک کے دفاع اور قومی مفادات کے تحفظ میں اپنا کردار ادا کرتی رہیں گی۔بیان میں کہا گیا کہ امن،استحکام اور قومی ترقی کے فروغ میں بھی مسلح افواج اپنا کردار جاری رکھیں گی۔یومِ آزادی کے موقع پر مسلح افواج نے شہدا کی عظیم قربانیوں کو خراجِ عقیدت پیش کرتے ہوئے غازیوں، سابق فوجیوں اور قانون نافذ کرنے والے اداروں کے اہلکاروں کی خدمات کو بھی سراہا۔ آئی ایس پی آر کے مطابق ان افراد نے ملک کی آزادی،سلامتی اور قومی مفادات کے تحفظ کے لیے عزم و بہادری کی مثالیں قائم کیں۔
مسلح افواج نے قوم کو اتحاد،قومی یکجہتی،رواداری اور برداشت کو فروغ دینے کا پیغام دیتے ہوئے کہا کہ پاکستان کی اصل طاقت اس کے عوام کے اتحاد اور اجتماعی عزم میں مضمر ہے۔قوم کو قائداعظم محمد علی جناح کے سنہری اصول ”ایمان، اتحاد اور نظم و ضبط“ سے اپنی وابستگی مزید مضبوط کرنے کی تلقین بھی کی گئی۔یومِ آزادی کے دن کا آغاز ملک کے مختلف حصوں میں توپوں کی سلامی سے ہوا جبکہ نمازِ فجر کے بعد مساجد میں پاکستان کی سلامتی، ترقی،امن،یکجہتی اور خوشحالی کے لیے خصوصی دعائیں کی گئیں۔جشنِ آزادی کے موقع پر کراچی میں مزارِ قائد پر گارڈز کی تبدیلی کی پروقار تقریب بھی منعقد ہوئی،جہاں پاکستان نیول اکیڈمی کے چاق و چوبند کیڈٹس نے اعزازی گارڈز کے فرائض سنبھالے۔تقریب میں قومی یکجہتی،نظم و ضبط اور بانیِ پاکستان کے نظریات سے وابستگی کا اظہار کیا گیا۔
آئی ایس پی آر کے مطابق مسلح افواج نے قوم کو یقین دلایا کہ پاکستان کے دفاع اور سلامتی کے لیے ان کا عزم کسی بھی خطرے سے متاثر نہیں ہو گا۔افواجِ پاکستان ملک کی خودمختاری،علاقائی سالمیت اور قومی مفادات کے تحفظ کے لیے ہر وقت تیار رہیں گی۔مسلح افواج کے پیغام میں کہا گیا کہ پاکستان کے استحکام اور خوشحالی کے لیے ضروری ہے کہ پوری قوم اختلافات سے بالاتر ہوکر قومی یکجہتی کو فروغ دے،برداشت کو اپنائے اور ملکی ترقی میں اپنا کردار ادا کرے۔آئی ایس پی آر نے قوم پر زور دیا کہ یومِ آزادی محض جشن منانے کا دن نہیں بلکہ آزادی کی حفاظت، بانیانِ پاکستان اور شہدا کی قربانیوں کو یاد کرنے اور قومی ذمہ داریوں کی تجدید کا موقع بھی ہے۔ اس موقع پر ایک مضبوط، متحد،پرامن اور خوشحال پاکستان کے لیے اجتماعی عزم کی ضرورت پر زور دیا گیا۔مسلح افواج نے اپنے پیغام کے اختتام پر قوم کے ساتھ مل کر امن،استحکام،قومی ترقی اور خوشحالی کے لیے ثابت قدم رہنے کے عزم کا اظہار کیا اور پاکستان کی سلامتی و استحکام کے لیے اپنی ذمہ داریاں پوری کرنے کا یقین دلایا۔