احسن اقبال کی مولانا فضل الرحمان سے ملاقات،قومی و بین الاقوامی امور پر تفصیلی تبادلہ خیال

پشاور(ایگزو نیوز ڈیسک)وفاقی وزیر احسن اقبال نے مولانا فضل الرحمان کی رہائشگاہ پہنچ کر ایک اہم ملاقات کی،جس میں دونوں رہنماوں نے ملکی اور بین الاقوامی سطح کے حساس معاملات پر تفصیلی تبادلہ خیال کیا۔
ایگزو نیوز کے مطابق وفاقی وزیر احسن اقبال  قائد جمعیت مولانا فضل الرحمٰن کی رہائش آمد پہنچ گئے جہاں انہوں نے مولانا سے تفصیلی ملاقات کی ،اس موقع پر سابق وفاقی وزیر مولانا اسعد محمود بھی موجود تھے۔ملاقات میں غزہ پیس معاہدے پر مولانا فضل الرحمان کے تحفظات کو بغور سنا گیا اور ان کے خدشات کو مرکزی حکومت تک پہنچانے کا یقین دلایا گیا۔مولانا فضل الرحمان نے اسرائیل اور فلسطین کے معاملے پر حکومتی پالیسیوں پر عدم اطمینان کا اظہار کرتے ہوئے کہا کہ امتِ مسلمہ کے جذبات کو ہمیشہ مدنظر رکھنا ضروری ہے۔ملاقات کے دوران ملکی سیاسی صورتحال،اپوزیشن کے موقف اور دیگر اہم قومی امور پر بھی تفصیلی گفتگو ہوئی۔احسن اقبال نے کہا کہ حکومت تمام سیاسی قوتوں کو اعتماد میں لینے کی خواہاں ہے اور مولانا فضل الرحمان کے خدشات وزیراعظم تک پہنچائے جائیں گے۔ذرائع کا کہنا ہے کہ ملاقات خوشگوار ماحول میں اختتام پذیر ہوئی اور دونوں رہنماوں نے ملکی مفاد کو مدنظر رکھتے ہوئے آگے بڑھنے پر اتفاق کیا۔