افغان جنگ کے اثرات: پیٹرول 8 روپے، ڈیزل 5.16 روپے مہنگا،حکومت کا رات کی تاریکی میں عوام کی جیبوں پر حملہ

اسلام آباد(ایگزو نیوز ڈیسک) افغان جنگ کے اثرات واضح ہوتے ہوئے عام شہریوں کی مشکلات میں اضافہ ہو رہا ہے۔حکومت کی رات کی تاریکی میں پیٹرول اور ڈیزل کی قیمتوں میں اضافہ عوام کی جیبوں پر ایک بھاری دھچکا ہے،8 روپے فی لیٹر پیٹرول اور 5.16 روپے ڈیزل کے اضافے نے عام آدمی کی روزمرہ ضروریات کو مزید مہنگا اور ناقابل برداشت کر دیا ہے،حکومت کا یہ قدم نہ صرف اقتصادی دباو میں اضافہ کرے گا بلکہ خطے میں جاری افغان کشیدگی کے اثرات کو بھی عوام پر براہِ راست محسوس کرائے گا،عوامی حلقوں نے اس فیصلے کو ناگزیر نہیں بلکہ ایک سیاسی اور اقتصادی جارحیت قرار دیا ہے،جو عام شہریوں پر مہنگائی کے بھاری بوجھ کا سبب بنے گا۔
ایگزو نیوز کے مطابق حکومت نے پیٹرولیم مصنوعات کی قیمتوں میں اضافہ کر دیا ہے، جس کا اعلان وزارت خزانہ کی جانب سے جاری کیے گئے اعلامیے میں کیا گیا۔ اعلامیے کے مطابق پیٹرول کی قیمت میں فی لیٹر 8 روپے کا اضافہ کیا گیا ہے۔اسی طرح، ڈیزل کی قیمت میں 5 روپے 16 پیسے فی لیٹر کا اضافہ کیا گیا ہے۔اعلامیے میں مزید بتایا گیا کہ فیول پرائس ایڈجسٹمنٹ کے بعد نئی قیمتیں آج رات بارہ بجے سے نافذ العمل ہوں گی۔حکومتی ذرائع کا کہنا ہے کہ عالمی مارکیٹ میں خام تیل کی قیمتوں میں اضافہ اور مقامی ٹیکسز میں تبدیلی اس اقدام کی بنیادی وجہ ہیں۔ماہرین اقتصادیات کے مطابق اس اضافہ سے نہ صرف ٹرانسپورٹ اور لاجسٹک شعبے متاثر ہوں گے بلکہ مہنگائی کی شرح میں بھی اضافہ متوقع ہے،جو روزمرہ اشیا کی قیمتوں پر اثر ڈال سکتا ہے۔عوامی حلقوں نے بھی اس فیصلے پر شدید ردعمل ظاہر کیا ہے اور قیمتوں میں اضافے کے اثرات پر تشویش کا اظہار کیا ہے۔وزارت خزانہ نے یقین دلایا ہے کہ حکومت عوام پر مالی دباو کو کم کرنے کے لیے ممکنہ امدادی اقدامات کا جائزہ لے رہی ہے اور ضروری صورت میں سبسڈی یا رعایتی پالیسی متعارف کرائے گی۔