دنیا بھر میں ہیکرز اور مالی فراڈ میں ملوث عناصر کی مدد کرنے والا گروہ شکنجے میں آ گیا۔ پاکستان سے چلنے والا سائبر کرائم ویب سائٹس کا نیٹ ورک پکڑا گیا۔
امریکی اور ڈچ حکام نے دنیا بھر میں ویب سائٹس ہیکنگ ٹولز بیچنے اور مالی فراڈ میں ملوث پاکستانی گروہ کے خلاف کارروائی کرتے ہوئے پاکستان سے چلنے والی 39 سائبر کرائم ویب سائٹس بلاک کردیں۔
امریکی محکمہ انصاف کے مطابق ان سائٹس کے سرورز بھی بند کر دیے گئے ہیں، یہ ویب سائٹس ہیکنگ اور مالی فراڈ میں ملوث بین الاقوامی گروہوں کو غیر قانونی ٹولز فروخت کررہے تھے۔ امریکی محکمہ انصاف کے مطابق’صائم رضا‘ گروپ جسے ’ہارٹ سینڈر‘ بھی کہا جاتا ہے، نامی گروہ کے زیرانتظام چلنے والے آن لائن مارکیٹ پلیسز کو نشانہ بنایا گیا، گروہ نے اس طرح کے ٹولز کے استعمال کے لیے ہدایات پر مبنی ویڈیوز بھی اپ لوڈ کر رکھی تھیں۔
تحقیقات کے مطابق 2020 سے سرگرم نیٹ ورک نے امریکی شہریوں کو 30 لاکھ ڈالرز سے زیادہ نقصان پہنچایا۔ یہ ویب سائٹس فشنگ کٹس، اسکیمنگ پیجز اور ای میل ایکسٹریکٹرز جیسے ہیکنگ ٹولز فروخت کر رہی تھیں جو کاروباری ای میل کمپرو مائز فراڈ میں استعمال کیے جاتے تھے۔