جمہوریہ ڈومینیکن کے نائٹ کلب کی چھت گرنے سے 98 افراد ہلاک، 150 سے زائد زخمی ہوگئے۔
بی بی سی کے مطابق، یہ حادثہ سانتو ڈومنگو میں مشہور گلوکار ربی پیریز کے کنسرٹ کے دوران پیش آیا۔ چھت گرنے سے کم از کم 98 افراد ہلاک ہو گئے جبکہ 150 سے زائد زخمی ہو گئے۔ حکام نے بتایا کہ ہلاک ہونے والوں میں مونٹی کرسٹی صوبے کی گورنر نیلسی کروز اور سابق بیس بال کھلاڑی اوکٹاویو ڈوٹیل شامل ہیں۔
حادثے کے وقت نائٹ کلب میں سیکڑوں افراد موجود تھے، اور کئی افراد ملبے تلے دب گئے ہیں جن کی تلاش کے لیے ریسکیو آپریشن جاری ہے۔ ریسکیو ٹیموں نے ہلاکتوں کی تعداد میں اضافے کا خدشہ ظاہر کیا ہے، تاہم ایمرجنسی آپریشنز سینٹر کے ڈائریکٹر نے امید ظاہر کی ہے کہ ملبے میں کچھ افراد زندہ بھی ہو سکتے ہیں۔
جمہوریہ ڈومینیکن کے صدر نے اس افسوسناک واقعے پر متاثرہ خاندانوں سے گہرے دکھ اور ہمدردی کا اظہار کیا ہے۔