راولپنڈی(ایگزو نیوز ڈیسک)سیکیورٹی فورسز نے خیبرپختونخوا اور بلوچستان کے مختلف علاقوں میں انٹیلی جنس بنیادوں پر کیے گئے مربوط آپریشنز کے دوران 32 دہشتگردوں کو ہلاک کر دیا ہے۔
پاک فوج کے شعبہ تعلقات عامہ (آئی ایس پی آر) کے مطابق یہ کارروائیاں گزشتہ 24 گھنٹوں کے دوران عمل میں لائی گئیں، جن کا ہدف ایسے عناصر تھے جو ملک میں بدامنی پھیلانے کی کوششوں میں ملوث تھے۔آئی ایس پی آر کے مطابق ضلع خیبر میں 28 اور 29 جولائی کی درمیانی شب کیے گئے ٹارگٹڈ آپریشنز میں دہشتگردوں کے ٹھکانوں کو موثر انداز میں نشانہ بنایا گیا،جس کے نتیجے میں فتنہ الخوارج سے تعلق رکھنے والے 24 دہشتگرد ہلاک ہوئے۔بیان میں کہا گیا ہے کہ کارروائیاں مستند انٹیلی جنس معلومات کی بنیاد پر کی گئیں،جن میں دہشتگردوں کی موجودگی کی نشاندہی کی گئی تھی۔اسی طرح بلوچستان کے ضلع نوشکی میں بھی سیکیورٹی فورسز نے انٹیلی جنس کی بنیاد پر متعدد کارروائیاں کیں،جہاں شدید فائرنگ کے تبادلے کے بعد فتنہ الہندوستان سے وابستہ 8 دہشتگرد مارے گئے۔آپریشنز کے دوران دہشتگردوں کے زیر استعمال اسلحہ،گولہ بارود اور دیسی ساختہ دھماکا خیز مواد(آئی ای ڈیز)برآمد کر کے ناکارہ بنا دیا گیا۔
ترجمان پاک فوج کے مطابق کارروائیوں کا مقصد نہ صرف دہشتگردوں کے نیٹ ورک کو ختم کرنا ہے بلکہ ان کے سہولت کاروں کا قلع قمع بھی یقینی بنانا ہے۔بیان میں کہا گیا ہے کہ ملک کے مختلف علاقوں میں بھارتی سرپرستی میں سرگرم عناصر کے خلاف کلیئرنس آپریشنز بدستور جاری ہیں تاکہ کسی بھی ممکنہ خطرے کو بروقت ختم کیا جا سکے۔آئی ایس پی آر نے اس عزم کا اعادہ کیا کہ سیکیورٹی فورسز ملک سے دہشتگردی کے مکمل خاتمے کے لیے پرعزم ہیں اور قومی سلامتی کو درپیش کسی بھی چیلنج کا بھرپور جواب دیا جائے گا۔