سکیورٹی فورسز نے تیراہ میں کامیاب آپریشن کرکے 22 دہشت گردوں کو ہلاک کر دیا۔ آپریشن میں 18 دہشت گرد شدید زخمی ہوئے ہیں۔
تفصیلات کے مطابق پاک فوج کے تعلقات عامہ آئی ایس پی آر کی جانب سے بیان میں کہا گیا ہے کہ خیبر کے علاقے تیراہ میں بڑھتے دہشت گردی واقعات پر سیکیورٹی فورسز نے کارروائیاں کیں۔
فوج کے میڈیا ونگ کے مطابق، اس علاقے میں سیکورٹی فورسز اور معصوم شہریوں کو نشانہ بناتے ہوئے دہشت گردی کے متعدد واقعات دیکھنے میں آئے، جن میں متعدد ہلاکتیں ہوئیں۔
جس کے جواب میں، 14 دسمبر 2024 سے انٹیلی جنس پر مبنی کارروائیاں شروع کی گئی ہیں، جن کا مقصد ان گھناؤنی کارروائیوں کے ذمہ دار عسکریت پسندوں کو بے اثر کرنا ہے۔
آئی ایس پی آر نے زور دے کر کہا کہ یہ آپریشن امن کی بحالی اور عسکریت پسندوں کے خاتمے تک جاری رہیں گے۔ سیکیورٹی فورسز ملک سے دہشت گردی کی لعنت کے خاتمے کے لیے پرعزم ہیں۔