پشاور(ایگزو نیوز ڈیسک)خیبرپختونخوا کے ضلع اورکزئی میں پاکستانی سیکیورٹی فورسز نے خفیہ اطلاع پر ایک بھرپور انٹیلی جنس بیسڈ آپریشن کے دوران بھارت کی حمایت یافتہ دہشت گرد تنظیم ”فتنہ الخوارج“ کے نیٹ ورک کو تباہ کر دیا۔
پاک فوج کے شعبہ تعلقاتِ عامہ (آئی ایس پی آر) کے مطابق یہ فیصلہ کن کارروائی 7 اور 8 اکتوبر کی درمیانی شب کی گئی،جس میں 19 خطرناک دہشت گردوں کو ہلاک کر دیا گیا۔یہ تمام شدت پسند ملک میں امن و امان کی فضا کو سبوتاژ کرنے اور بیرونی قوتوں کے ایجنڈے پر کام کر رہے تھے۔آئی ایس پی آر کے بیان میں کہا گیا ہے کہ پاک فوج کے جوانوں نے شجاعت،پیشہ ورانہ مہارت اور غیر متزلزل عزم کا مظاہرہ کرتے ہوئے دشمن کو کاری ضرب لگائی تا ہم دہشت گردوں کی شدید فائرنگ کے تبادلے میں راولپنڈی کے رہائشی لیفٹننٹ کرنل جنید عارف(عمر 39 سال)اور میجر طیب راحت(عمر 33 سال)نے آپریشن کی قیادت کرتے ہوئے جامِ شہادت نوش کیا۔دونوں افسران نے بہادری،عزم اور وطن سے والہانہ محبت کی وہ مثال قائم کی جو ہمیشہ یاد رکھی جائے گی۔آپریشن کے دوران نو دیگر سپاہیوں نے بھی مادرِ وطن پر اپنی جانیں نچھاور کر دیں۔ان شہداء میں نائب صوبیدار اعظم گل(38 سالہ،ضلع خیبر)،نائیک عادل حسین(35 سالہ، ضلع کرم)،نائیک گل امیر(34 سالہ،ضلع ٹانک)،لانس نائیک شیر خان(31 سالہ،ضلع مردان)،لانس نائیک طالش فراز(32 سالہ،ضلع مانسہرہ)،لانس نائیک ارشاد حسین(32 سالہ،ضلع کرم)،سپاہی طفیل خان(28 سالہ،ضلع ملاکنڈ)،سپاہی عاقب علی(23 سالہ،ضلع صوابی)،سپاہی محمد زاہد(24 سالہ،ضلع ٹانک)شامل ہیں۔
آئی ایس پی آر کے مطابق علاقے میں تطہیری کارروائیاں جاری ہیں تا کہ کسی بھی چھپے ہوئے دہشت گرد یا ان کے سہولت کاروں کو گرفتار یا ہلاک کیا جا سکے۔
ترجمان پاک فوج نے واضح کیا کہ پاکستان کی سیکیورٹی فورسز ملک سے بھارتی حمایت یافتہ دہشت گردی کے مکمل خاتمے کے لیے پرعزم ہیں۔انہوں نے کہا کہ ہمارے بہادر افسران و جوانوں کی قربانیاں قوم کے حوصلے کو مزید مضبوط کرتی ہیں اور یہ قربانیاں پاکستان کے پرچم کو ہمیشہ سربلند رکھیں گی۔آئی ایس پی آر نے پوری قوم سے اپیل کی کہ وہ اپنے شہداء کی عظیم قربانیوں کو سلام پیش کرے اور دہشت گردی کے خلاف جاری اس قومی جہاد میں اپنی افواجِ پاکستان کے ساتھ متحد و مضبوط کھڑی رہے۔