شہید محترمہ بینظیر بھٹو کی 18ویں برسی لیکن زخم آج بھی تازہ،سندھ بھر میں عام تعطیل کا اعلان،ملک بھر سے قافلے گڑھی خدا بخش کی جانب رواں دواں

کراچی(ایگزو نیوز ڈیسک)پاکستان کی سابق وزیر اعظم اور پیپلز پارٹی کی رہنما، شہید محترمہ بینظیر بھٹو کی 18ویں برسی کل(ہفتہ) منائی جا رہی ہے لیکن 18 سال بعد بھی اہل خانہ اور عوام کے زخم آج بھی تازہ ہیں،سندھ حکومت نے برسی کے موقع پر کل صوبے بھر میں عام تعطیل کا اعلان کیا ہے جبکہ ملک بھر سے قافلے گڑھی خدا بخش کے مزار کی جانب روانہ ہیں تا کہ محترمہ بھٹو اور شہید کارکنوں کی یاد میں خصوصی تقریبات میں شریک ہو سکیں۔
ایگزو نیوز کے مطابق سندھ حکومت نے پاکستان کی سابق وزیر اعظم محترمہ بینظیر بھٹو کی 18ویں برسی کے موقع پر ہفتہ 27 دسمبر کو صوبے بھر میں عام تعطیل کا اعلان کر دیا ہے۔اس حوالے سے کراچی سے جاری محکمہ محنت کے اعلامیہ میں بتایا گیا کہ برسی کی مناسبت سے سندھ کے تمام سرکاری دفاتر اور ادارے بند رہیں گے۔برسی کی تقریبات گڑھی خدا بخش میں محترمہ بھٹو کے مزار پر منعقد کی جائیں گی،جس میں ملک بھر سے قافلے شریک ہوں گے۔شہر کے اہم چوراہوں پر استقبالیہ کیمپ بھی لگائے گئے ہیں تا کہ شہریوں کو سہولت فراہم کی جا سکے۔پیپلز پارٹی کی قیادت میں پیدل قافلہ سکھر سے گڑھی خدا بخش بھٹو مزار کے لیے روانہ ہو چکا ہے،۔پیپلز پارٹی کے مطابق پیدل قافلہ عوامی سیاست،جمہوری جدوجہد اور شہداء کے مشن سے وابستگی کی علامت ہے۔قافلے کے ساتھ فرسٹ ایڈ، پانی،کھانے اور موبائل چارجنگ کی سہولتیں بھی فراہم کی گئی ہیں۔قافلہ آج مدیجی پہنچے گا اور رات قیام کے بعد گڑھی خدا بخش روانہ ہوگا۔مزار پر پہنچنے پر شرکاء کے لیے دوپہر کے کھانے کا بھی انتظام کیا گیا ہے۔پارٹی نے میڈیا کے مثبت کردار پر اظہارِ تشکر بھی کیا ہے۔

واضح رہے کہ محترمہ بینظیر بھٹو کو 27 دسمبر 2007 کو راولپنڈی میں پیپلز پارٹی کے جلسے کے بعد شہید کر دیا گیا تھا،جس میں 23 پارٹی کارکن بھی شہید ہوئے۔ پاکستان میں لیاقت باغ کے سانحے کی یاد میں آج بھی یادگار نہ بن سکی ہے جبکہ اہل خانہ آج بھی اس دن کو غم اور یاد میں گزاریں گے۔اس سانحے کے اصل محرکات اب تک سامنے نہیں آ سکے اور لیاقت باغ میں شہید ہونے والے پہلے وزیراعظم لیاقت علی خان کے قاتلوں کا بھی سراغ نہیں ملا۔شہید کارکنوں کے بچے پارٹی کے تعاون سے آج بھی خود کفیل ہیں اور پیپلز پارٹی کے ساتھ وابستگی قائم رکھے ہوئے ہیں۔محترمہ بینظیر بھٹو کی برسی نہ صرف سیاسی تاریخ کا اہم واقعہ ہے بلکہ یہ جمہوری اقدار اور عوامی محبت کی علامت بھی ہے،جو ہر سال ملک بھر میں یادگار تقریبات کے ذریعے زندہ رکھی جاتی ہیں۔