قوم آج بابائے قوم قائداعظم محمد علی جناح کا 148 واں یوم پیدائش اس عزم کی تجدید کے ساتھ منا رہی ہے کہ وہ پاکستان کیلئے ان کے تصور کردہ نظریات کے حصول کیلئے سخت محنت کریں گے۔
دن کا آغاز وفاقی اور صوبائی دارالحکومتوں میں توپوں کی سلامی سے ہوا جب کہ کراچی میں مزار قائد پر گارڈز کی تبدیلی کی پروقار تقریب ہوئی۔
قائداعظم محمد علی جناح 25 دسمبر 1876 کو کراچی میں پیدا ہوئے۔ انہوں نے 1913 سے 14 اگست 1947 کو پاکستان کی آزادی تک آل انڈیا مسلم لیگ کے رہنما کے طور پر خدمات انجام دیں۔
قائداعظم نے برصغیر کے مسلمانوں کے حق خود ارادیت کیلئے بہادری سے جدوجہد کی۔ ان کی قیادت، وکالت اور ایمان پاکستان کی تخلیق کا باعث بنا جسے اس وقت ناممکن سمجھا جاتا تھا۔
قیام پاکستان کیلئے قائد کی جدوجہد پر روشنی ڈالنے اور اتحاد، ایمان اور نظم و ضبط کے رہنما اصولوں کو اجاگر کرنے کیلئے ملک بھر میں خصوصی پروگرام منعقد کیے گئے۔ آج کے دن کیلئے ملک بھر میں عام تعطیل کا اعلان کیا گیا تھا۔
تمام شعبہ ہائے زندگی سے تعلق رکھنے والے افراد کی ایک بڑی تعداد برصغیر کے مسلمانوں کیلئے علیحدہ وطن کے قیام کیلئے ان کی خدمات کو خراج عقیدت پیش کرنے کیلئے مقبرے پر حاضری دے رہے ہیں۔