12
اسکواش کے سابق مایہ ناز کھلاڑی اور عالمی چیمپئین جان شیر خان کی وزیراعظم شہباز شریف سے ملاقات، وزیراعظم نے اُن کو خراج تحسین پیش کیا۔
میڈیا رپوٹس کے مطابق اس موقع پر شہباز شریف نے کہا کہ پاکستان میں اسکواش کے کھیل کو مقبول بنانے اور اس کھیل کے فروغ کیلئے آپ کی خدمات قابل قدر ہیں۔ آپ نے اپنے کھیل کے ذریعے ملک کا نام پوری دنیا میں روشن کیا۔ پوری قوم کو آپ کی کامیابیوں پر فخر ہے۔
وزیر اعظم نے متعلقہ حکام کو جان شیر خان کے علاج معالجہ کے حوالے سے ہر ممکن اقدامات اٹھانے کی ہدایت کرتے ہوئے کہا، حکومت ملک میں اسکواش سمیت تمام کھیلوں کے فروغ کیلئے خاطر خواہ اقدامات کر رہی ہے۔ انہوں نے مزید کہا کہ نوجوانوں کو کھیلوں کے میدان اور اسپورٹس کی بہترین سہولیات کی فراہمی حکومت کی ترجیحات میں شامل ہیں۔