پاکستان مسلم لیگ ن کے صدر اور سابق وزیر اعظم نواز شریف نے بلوچستان میں قیمتی جانوں کے ضیاع پر اپنے دکھ کا اظہار کیا ہے۔
صدر ن لیگ نے ایکس پلیٹ فارم کا استعمال آہستہ آہستہ بڑھا دیا ہے۔ رواں سال وہ ایکس پر 9 ٹویٹ کر چکے ہیں۔ سابق وزیراعظم اس پلیٹ فارم کو زیادہ تر تعزیت اور مبارکباد دینے کیلئے استعمال کرتے ہیں۔ انہوں نے تین جنوری کو سرتاج عزیر جبکہ 18 مارچ کو راجہ وقار ممتاز کے انتقال پر افسوس کیا۔
اسی طرح نواز شریف نے 25 مارچ کو ہولی جبکہ 10 اپریل کو عید الفطر کی مبارکباد کی پوسٹ شئیر کی، انہوں نے 20 مئی کو ایرانی صدر ابراہیم رئیسی کے ہیلی کاپٹر حادثے میں انتقال پر بھی ٹویٹ کیا۔ اس کے علاوہ انہوں نے 10 جون کو نریندر مودی کو بھارت کا تیسری بار وزیراعظم بننے پر مبارکباد دی۔
صدر ن لیگ کی ایکس پر پوسٹ کا سلسلہ جاری رہا ، اور پھر انہوں نے 17 جون کو عید الا ضحیٰ اور نو اگست کو ارشد ندیم کو کامیابی پر مبارکباد دی جبکہ گزشتہ ہفتے کچے کے علاقے میں ڈاکوں کے حملے میں پولیس کے جوانوں کی شہادت پر پوسٹ کی۔