لاہور میں مسلسل طوفانی بارشیں،نو افراد جان کی بازی ہار گئے

لاہور(ایگزو نیوز ڈیسک)صوبائی دارالحکومت لاہور میں ہونے والی طوفانی بارش سے اب تک کی اطلاعات کے مطابق گھروں کی چھتیں گرنے سے نو افراد جاں بحق جبکہ آٹھ زخمی ہو گئے ہیں،جان کی بازی ہارنے والوں میں بچے اور خواتین بھی شامل ہیں۔
ایگزو نیوز کے مطابق پنجاب کے دارالحکومت میں ٹھوکر نیاز بیگ کے قریب مرید وال گاؤں میں گھر کی چھت گرنے سے 5 افراد جان کی بازی ہار گئے،امدادی گاڑیاں اور عملہ جائے حادثہ پر پہنچ گیا،گھر کی چھت مٹی اور لکڑی سے بنی ہوئی تھی،اربن سرچ اینڈ ریسکیو ٹیم نے ملبے تلے پھنسے 2 افراد کو زندہ نکال لیا۔جاں بحق ہونے والوں میں 2 خواتین،2 بچیاں اور ایک بزرگ شامل ہیں،جن کی شناخت 60 سالہ مانگا،55 سالہ عشرت،35 سالہ رانی،3 سالہ خدیجہ اور 4 سالہ لطیفہ کے ناموں سے ہوئی۔کوٹ جمال پورہ میں لڑکی اور مٹی سے بنی گھر کی چھت گرگئی،حادثے میں ایک شخص جان کی بازی ہار گیا،ملبے سے 3 افراد کو زندہ نکال لیا گیا۔دوسری طرف رائے ونڈ روڈ مشن کالونی میں گھر کی چھت گرنے سے 3 افراد جان بحق ہو گئے،اطلاع ملنے پر امدادی ٹیم نے ملبے سے ایک فرد کو زندہ نکال لیا۔